Gouel ar Mammoù

Da vamm an holl vammoù
Hiziv gouel ar mammoù
Gouel ar Garantez c’hlan
Ma trid ar c’halonoù
Holl a-unan
… Me zo va-unan,
Va mammoù-me zo holl en Neñv
Va mamm hervez ar gwad,
Va mamm hervez ar spered,
Ha mamm an holl vammoù
Mamm an holl emzivaded
… Em c’halon e sav ur galv
Em c’halon ‘n em sil ur c’hlemm
Daeroù zo war va dremm
Ur vorenn em Ene.
… O burzhud dispar
A-greiz-holl heol a bar
Tec’hout a ra va Anken
Setu yaouankiz en-dro din
Setu Breizhiz yaouank em zi
Barr o lagad a Levenez
Barr o lavar a Garantez
Evit Breizh kozh
O, Mamm an holl vammoù,
Mamm an Hini zo mestr an holl vroioù
Ra vezo ho Pennozh
War Blant yaouank ar Vro gozh

1967







« »