![\"\"](\"http:\/\/www.anjela.org\/oberenn\/wp-content\/uploads\/2018\/11\/balan.jpg\")
<\/p>\n<\/p>\n
Balanegi burzhudus va bed bugel ma tira\u00f1sen diouzhoc’h an aour a-varlennado\u00f9. Ar bleu\u00f1v trellus ma tastumemp a sac’hado\u00f9, ni bugale ar skol, evit Sul ar Sakramant ! Pelec’h int tremenet ? Drouklazhet evel inosanted santel gant ar mekaniko\u00f9 diaoulek\u2026 Drouklazhet evel kement tra n’eo ket profitus, eme an deknokrated. Evit an aotrounez-se avat, eo \u00ab profitus \u00bb ar seurt dismantro\u00f9.<\/p>\n
Balanegi madelezhus a roas bod ha repu d’ar Chouanted gwechall. Balanegi benniget a roe ken brokus danvez d’an dudigo\u00f9 d’ober toenno\u00f9 war o lojeiz, tiez ha krevier loened. A roe danvez tan d’an terouero\u00f9 paour ma save enno nebeut a goad. A roe danvez skubellenno\u00f9 d’an dud diwar ar maez ha zoken da dud ar bourko\u00f9 ha da zarn eus k\u00ear. Rak mont a rae, hervez klevet, ar beizanted da werzha\u00f1 skubellenno\u00f9 bezv ha balan en k\u00ear ha d’ar sitreado\u00f9 na daolent ket a valan. Istimet e oa ar balan evel gor gant ar fornierien ha dreist-holl gant ar wastellerien er c’h\u00eario\u00f9 evel Lannuon, da skouer \u2014 ar bezv ivez, hervez. N’ouzon ket re vat evit pe abeg.<\/p>\n
Em yaouankiz ‘oa stank ar balanegi. E pep menaj, dre ama\u00f1, e veze dalc’hmat ul lodenn douar dindan balan, an douaro\u00f9 ska\u00f1v ha diaes da zarempredi\u00f1. Ret-mat ‘oa kaout balan evit an toenno\u00f9. Na bade ket keit un doenn-valan hag un doenn-blouz. Met re vihan ‘veze ar plouz alies er feurmio\u00f9 bihan evit diouerout a-walc’h da dei\u00f1. En glas pe hanter-we\u00f1vet ‘veze implijet ar balan-to. Graet am eus alies ar vicher krenna\u00f1 balan d’an toer. Gant ar falz da zrailha\u00f1 keuneud war ar pigos ‘veze troc’het ar bego\u00f9, bod ha bod, ha graet fagodenno\u00f9 kempenn anezho. An treu\u00f1cho\u00f9 ‘veze adamarret ivez ha berniet evit beza\u00f1 devet dre bep ma veze ezhomm. Tan nerzhus-kena\u00f1 a ra ar balan. Met arabat eo dezho beza\u00f1 louet pe na bader ket gant c’hwezh kre\u00f1v ar moged. Ha koulskoude ‘veze graet implij evel louzo\u00f9 gant moged balan glas evit ober d’ar saout koe\u00f1vet glaourenni\u00f1 ha poursat, ar pezh o sikoure da zigoe\u00f1vi\u00f1.<\/p>\n
Merzet am eus ivez ez eo sot-nay ar c’hezeg kozh gant ar balan dreist-holl pa vez bleu\u00f1v enne. Pa dremenont a-rez ur bod balan e trammont ur c’henaoued en ur dira\u00f1sa\u00f1 ar bleu\u00f1v pa c’hellont. O anien ! Gouzout a ra al loened gwelloc’h eget an dud petra a zo mat evit o yec’hed. Ha setu : er balan zo un dourenn anvet \u00ab spartein \u00bb hag a vez implijet evit kle\u00f1vedo\u00f9 ar galon.<\/p>\n
Ar gwenan avat n’eont morse war ar bleu\u00f1v balan. N’int ket mat d’ober mel. D’al lapined eo mat rei\u00f1 ur wech an amzer bodo\u00f9 balan da grignat. Ar c’honikled gouez a grign kalz ar balan bihan.<\/p>\n
Daoust ha bez’ zo un nerzh hud bennak ivez er balan ? Perak e touge an dud a soursie eus dimezio\u00f9, ur vazh-valan ? Perak eo gant ur bod-balan ‘veze foetet ar peur- liesa\u00f1 ar vugale ? Perak ‘veze plantet bodo\u00f9 balan glas e-touez ar c’haol-pome pa zeue chapelouzed warne ? Ha perak ivez ‘veze foetet delwenn santez Radegond gant ur bod-balan pa na zegase ket ar pare d’ar c’hla\u00f1vour a ‘n em erbede outi ? Anavezet ‘m eus em yaouankiz un amezeg deomp a yae da Radegonda da c’houlenn ar pare d’e wreg gouliet. Klevet ‘m eus bet anezha\u00f1 o konta\u00f1 d’am mamm e kasfe ganta\u00f1, emeza\u00f1, ur bod balan da foeta\u00f1 ar santez. Me hag a oa desket din ez-vihanik kaout un douja\u00f1s vras evit ar sent a veze gwall estonet ha droukskoueriet end-eeun gant ur seurt prepoz\u2026 Ar pezh on sur ne oa ket talvezet d’an Teo foeta\u00f1 Radegonda. Marvet ‘oa e wreg, Doue d’o fardono tout brema\u00f1.<\/p>\n
Met evit distrei\u00f1 war ar balanegi, setu penaos e c’hoarveze. Ar balan ‘veze tennet gant un tra\u00f1ch-displanta\u00f1, ledet ur pennad amzer da we\u00f1vi\u00f1. Amarret neuze gant kevreo\u00f9 dibabet e-touez ar bodo\u00f9 munut hir ha gwevn. Graet am eus alies ar jeu- se. Savadellet ‘veze neuze ar fagod pa vezent reutaet un tamm ‘n ur we\u00f1vin.<\/p>\n
War-lerc’h ar balan ‘veze hadet ed-du ar bloaz kenta\u00f1 war gozh, sa\u00f1set. An eil bloaz, segal en distro-gozh, d’an trede, kerc’h. Ha goude ‘veze lezet adarre ar park da rei\u00f1 balan, a save o-unan e-touez an ed (dre natur an douar, a lavare ar re gozh). Ral ‘oa lakaat trao\u00f9 ha\u00f1v na foenn er balanegi. Ur red-ed ha balan a bep eil.<\/p>\n
Pa eo bet dilezet ar produi\u00f1 balan, dre m’en doa kollet ar balan o abeg beza\u00f1, ret eo bet traezha\u00f1 ha temzi\u00f1 solut ar balanegi ha pell eo bet dalc’het ar balan bihan da ziwan en trevado\u00f9 hadet. Pell-amzer a vir an had-balan o galloud kellida\u00f1.<\/p>\n
Ur wech all, mar plij gant Doue, e kontin deoc’h un istorig fentus, \u00ab Istor ar balan gwenn \u00bb. Re ziwezhat on fenoz rak div nadoz va orolaj a zo o krapat etrezek an hanternoz.<\/p>\n
<\/p>\n
23 a viz Gouere 1973<\/em><\/p>\n","protected":false},"excerpt":{"rendered":" Balanegi burzhudus va bed bugel ma tira\u00f1sen diouzhoc’h an aour a-varlennado\u00f9. Ar bleu\u00f1v trellus ma tastumemp a sac’hado\u00f9, ni bugale ar skol, […]<\/p>\n","protected":false},"author":1,"featured_media":0,"parent":0,"menu_order":0,"comment_status":"closed","ping_status":"closed","template":"","meta":{"_acf_changed":false,"ngg_post_thumbnail":0,"footnotes":""},"class_list":["post-2460","page","type-page","status-publish","hentry"],"acf":[],"yoast_head":"\n