Simudet !

Na ponner eo din fenoz da sioulañs
Diouer a ra din da vouezh Iwerzhon
C’hoar garet hor Bro-ni
Da vouezh bemnoz dreist ar mor don
A ziskenne ‘barzh va zi
Hag hi leun a sederni
Sonerezh ha kaniri.
Siwazh n’az klevan mui
Torret an Hud. Torret ar strobinell.
Simudet eo va ardivink
Marvet a varv trumm
Disul e-kreiz an oferenn-bred.
Marvet hep un huanadenn
Hep ur glemmadenn
Evel ur mouch gouloù
Toc’hor ‘oa ur pennad zo.
N’am eus bet sarmon ebet
Na « Liv an amzer »
Nag « ar Seizh-Avel »
Na notennoù strink ar Stivell
Na tarzhoù kurun Servat
Nag avelioù flour Youenn Gwernig
Na korventennoù Glenmor
Mouezhioù dizremm a leunie an ti !
Deut da vout keneiled din
Deut da vout karet ganin
Diouer ‘m eus ac’hanoc’h
N’eus mui ‘met an avel
Ganas o yudal e kan du ar siminal
Ponner ar sioulañs fenoz d’am digenvez
Bazailhat a ra va c’hi Fionn
Puchet war an oaled klouar
O luchañ ouzh va ardivink mut…

1977







« »